Ausgabe

STIMMIG

No. 35 | 2019/3

«Obacht Kultur» N° 35, 2019/3 ertönt vielstimmig.

Auftritt: Beatrice Dörig;
Bildbogen: Lika Nüssli und Gabriela Krapf;
Texte: Guy Krneta, Christian Zehnder, Ludwig Hasler u.v.m.

Online blättern
Ausgabe bestellen

Frischluft

Ein Garten für Orpheus

von Guy Krneta

D Natur het Regle. U d Kunscht het Regle. D Regle vor Kunscht sy nid d Regle vor Natur. U d Regle vor Natur sy nid d Regle vor Kunscht. D Regle vor Kunscht vrändere sech. Was mir hüt aus Kunscht begryfe, hei Früecheri nid aus Kunscht begriffe. D Kunscht ar Kunscht isch, d Regle vor Kunscht yzhauten u glychzytig gäge se z vrschtosse. D Regle vor Natur vrändere sech vilech nid. Aber es vränderet sech üse Blick uf si. U so vrändere si sech o, emu i üser Wahrnämig. Früecher het d Kunscht probiert d Natur z imitiere. Aber d Kunscht cha d Natur nid imitiere. Immer we d Kunscht d Natur imitiert, entschteit Kunscht. U immer we Kunscht entschteit, imitiert d Kunscht Kunscht. We d Kunscht Farben u Formen u Tön us dr Natur übertreit i Kunscht, macht si us de Farbe Farben und us de Forme Formen und us de Tön Tön. Wo für sich elei chöi schta, ohni Natur, nach de Regle vor Kunscht, u glych natürlech würke. Dasch ds Wunder vor Kunscht. Dass si cha natürlech würke, obwoou si natürlech künschtlech isch. Dass si, d Kunscht, üse Blick uf d Natur cha vrändere. Anderersyts: We sech üse Blick uf d Natur vränderet, wüu mr uf ds Mau nümm mit blossem Oug tüe luege, sondern mit Mikroskop u Elektronemikroskop, Röntgenapperät, Ultraschaugrät u Magnetresonanztomografe. Wo üs d Natur zeigen iren Art, wi mir sen us dr Kunscht scho meine z kenne: D Farben aus Farbe, d Formen aus Forme, d Tön aus Tön. Chunnt üs di Natur vor, wi we si würd Kunscht imitiere. Aus gieng d Kunscht vor u d Natur hinge nache. Aus wär d Kunscht ir Lag d Natur z beyflusse. Wi dr Orpheus. Wo mit sym Gsang het chönne Tier u Pflanzen u Schteine bewege. Ds Meer berueige. U dr Hung ir Höu. U vilech wär’r o ir Lag gsi mit sym Singe d Aminosüürine la z tanze. Aber di Liebschti zrüggzholen usem Toterych, het’r nid gschafft. Wüu’r zrügggluegt het. Wi d Kunscht geng zrüggluegt u nid angers cha, aus wär das ihri Natur. U geng wider probiert, di Tote zrüggzholen usem Toterych, mit ihrne Farben u Formen u Tön. U geng wider merkt, dass ere das nid glingt, nid cha glingen u drby nie öpis angers usechunnt aus Kunscht. Wüu si geng wider aaschteit bir Frag, dr Frag vo aune Frage, dr letschte Frag oder dr erschte, wi us dene Reglen u Formlen u Algorithme, wo mr chöi wahrnä, wo mr chöi begryfen u wo vilech sogar für beidi gäute, d Kunscht u d Natur, ir Natur Läbe wird.

Guy Krneta, geboren 1964 in Bern, lebt als freier Autorin Basel.
Er schreibt Texte fürs Theater, tritt als Spoken-Word-Autor auf, erzählt Geschichten am Radio, ist Mitbegründer des Spoken-Word-Ensembles «Bernistüberall» und initiierte das Schweizerische Literaturinstitut in Biel. Für sein Schaffen erhielt er verschiedene Preise, u.a. den Prix Suisseculture (2012) und den Schweizer Literaturpreis (2015). Zuletzt erschienen die Bücher «Filetschtück» (2016) und «Stottern und Poltern» (2017) mit gesammelten Theatertexten.

 

zurück